Faahfaahinta Warka

Dowladda Maraykanka ayaa soo jeediyay in Iiraan ay aqbasho in ay hakiso dhammaan howlaha lagu tayeeyo uranium-ka muddo labaatan sano ah, taasoo ah mid ka mid ah qodobbada ugu adag ee wadahadalladii dhexmaray labada dal oo lagu qabtay magaalada Islaamabaad ee dalka Baakistaan maalintii Sabtida iyo Axaddii, iyadoo Iiraan ay si adag u diiday soo jeedintan, waxayna ku celisay in muddadaas ay tahay mid aad u dheer oo ka hor timaada xuquuqdeeda qaranka. Sida ay xaqiijiyeen masuuliyiin Mareykan ah iyo ilo xog ogaal ah oo ka howlgala gudaha Baakistaan, wadahadalladii ugu dambeeyay ee tooska ahaa waxay diiradda saareen saddex qodob oo muhiim ah kuwaas oo kala ahaa: muddada hakinta howlaha nukliyeerka, xakamaynta maraakiibta iyo lacagaha jid furashada ee marin-biyoodka Hormuz, iyo xannibaadda lagu soo rogay iibka saliidda Iiraan. Qodobka ugu adag wuxuu ahaa muddada hakinta uranium-ka, kaas oo Maraykanku uu ku adkaystay inuu noqdo ugu yaraan labaatan sano, halka Iiraan ay soo jeedisay in muddadaasi ay noqon karto ugu badnaan shan sano oo keliya. Natiijo ahaan, khilaafka ku saabsan qodobadan ayaa horseeday in wadahadalladu ay fashilmaan, ka dib markii uu Madaxweyne Donald Trump uu qaatay go'aanka ah in uu dhaqan galiyo xannibaad badeed oo ka dhanka ah dhammaan maraakiibta soo gasha ama ka baxda dekedaha Iiraan. Tani waxay si weyn u kordhisay xiisadaha gobolka, waxaana la filayaa in aysan jirin wax wadahadal oo dhowaan soo noqon doona. Iiraan ayaa sheegtay in soo jeedinta Maraykanku ay tahay mid aan macquul ahayn oo ujeeddadeedu tahay in la jariyo awooddeeda difaac, iyadoo ay tusaale u soo qaadatay in dalalka kale sida Sacuudi Carabiya ay si xor ah u leeyihiin teknoolojiyadda nukliyeerka. Sidoo kale, Iiraan waxay soo bandhigtay in ay diyaar u tahay in ay ku noqoto shanta sano ee la isku raacay heshiiskii hore ee nukliyeerka sanadkii 2015, laakiin Maraykanku wuu diiday. Warbixinnada ugu dambeeyay ee soo baxay bisha Abriil sanadka 2026 ayaa sheegaya in Hay’adda Tamarta Atomiga ee Caalamka IAEA ay ku dhawaaqday in Iiraan ay kordhisay kaydkeeda uranium-ka lagu hodmay heerka ugu sareeya abid, iyadoo ay hadda haysato in ka badan afar boqol kiilo oo uranium ah oo ku dhow heerka hubka. Tani waxay ka dhigeysaa mid adag in Maraykanku aqbalo muddo gaaban oo hakineed. Dhinaca kale, saraakiil ka tirsan dowladda Iiraan ayaa uga digay in haddii Maraykanku uu sii wado cadaadiska, ay ka bixi doonto heshiiskii NPT ee ka hortagaya faafitaanka hubka nukliyeerka, taasoo keeni karta in ay soo saarto hubka nukliyeerka muddo bilo ah. Tani waxay noqonaysaa mid aad u khatar ah oo beddesha isu dheellitirka ciidan ee gobolka Bariga Dhexe. Guud ahaan, saddexda qodob ee la isku mari waayey ayaa noqonaya kuwa ugu waaweyn ee caqabad ku ah soo celinta wadahadallada, waxaana laga yaabaa in ay qaadato waqti dheer ka hor inta aan labada dhinac heshiis ku gaarin. Ilaa iyo hadda, xannibaadda badda ayaa sii socon doonta, waxaana la filayaa in Iiraan ay ka aargoosato iyadoo adeegsanaysa hubka ay haysato. DALNEWS