Faahfaahinta Warka

Khubarada dhinaca maraakiibta ayaa sheegay in 48-kii saacadood ee u dambeeyay la arkay waqtigii ugu mashquulka badnaa ee maraakiibta ka gudbaysa marin-biyoodka Hormuz tan iyo bilowgii dagaalka dhammaadkii bisha Febraayo, iyadoo ilaa soddon markab oo ka mid ah la raadraacay iyagoo qalabkooda aqoonsiga otomaatiga ah shiday. Michelle Wiese Bockmann oo ah falanqeeye ku takhasusay sirta badda ayaa tiri: "Haddii aan ahaan lahaa badmaax, aad baan u walwali lahaa," iyadoo tilmaantay in maraakiibta hadda socotaa ay yihiin kuwa ugu dambeeya ka hor inta aan xannibaaddu si buuxda u dhaqan galin. Richard Meade, oo ah tifaftiraha guud ee warsidaha Lloyd list, ayaa sheegay in uu jiro dhaqdhaqaaq weyn oo ku yimaadda maraakiibta, iyadoo qaar badan oo ka mid ah ay isku dayayaan inay ka baxaan dekedaha Iiraan ka hor inta aanay xannibaaddu soo koobid. Meade waxa uu intaas ku daray in ay qaadan doonto waqti ka hor inta aan la arkin ciidamada badda Maraykanka oo si firfircoon uga hor tagaya maraakiibta, iyadoo ay jirto suurtagalnimo in Iiraan ay isku daydo in ay ka faa'iideysato daqiiqadahan ugu dambeeya si ay u dhoofiso inta ugu badan ee saliidda ay haysato. Guud ahaan, xannibaadda Maraykanka ee Iiraan waxay noqonaysaa mid la mid ah khamaarka: waxay leedahay fursad ay ku guulaysato, laakiin waxay sidoo kale qaadanaysaa khataro weyn oo ay ka mid yihiin kor u kaca qiimaha saliidda, cadaadiska caalamiga ah, iyo suurtagalnimada in Iiraan ay ka aargoosato iyadoo adeegsanaysa hubka ay haysato. Waxaana la filayaa in labada dhinac ay sii wadaan iska hor imaadka maalmaha soo socota, iyadoo aan weli la ogeyn cidda ka adkaan doonta ciyaartan khatarta ah. DALNEWS