Faahfaahinta Warka
Xildhibaan Cabdiraxmaan Cabdishakuur Warsame ayaa qoraal uu soo saaray ku tilmaamay in Muqdisho ay dhismayso laakiin aysan korayn heerka dhabta ah ee horumarka, isagoo isbarbardhigaya dhismayaasha dhaadheer ee la dhisayo iyo burburka ka muuqda laamiyada, bullaacadaha oo roobabka qulqulaya, iyo xoolaha qaylada leh ee wadooyinka mara. Wuxuu yiri Muqdisho daaruhu samada way la tartamayaan, haddana bullaacadaha dhinac u qulqulaya, jidadka burbursan, iyo lo'da hoos harsata ayaa kashifaya xaqiiqo aan qarsooneyn: quruxdu waa mid dusha sare oo keliya. Canshuur saddex geesood ah ayaa laga qaadaa dadka degan iyo dhismayaasha, iyadoo aan adeeg loogama qabanayn. Geel, lo', iyo dameero ayaa wadooyinka kula tartamaya gawaarida qaaliga ah, qaarkoodna burbuursan yihiin, sidana waxay muujinaysaa laba adduun oo is dhex jira: mid aan weli ka tegin noloshii miyiga, dhaqankii qabiilka, iyo fikirkii baadiyaha, iyo mid bilow ah oo aan weli qaadin dhaqan magaalo, dowladnimo casri ah, iyo muwaadinnimo. Marka ay waqtiga salaadda subaxdu dhowdahay, magaaladu waxay isu beddeshaa meel sawaxan iyo codadku samada isku shareeraan, iyadoo aadaan, digri, iyo wacdi ay is qabsadaan, qofkii waayeelka ah ama nugul ee sugana in makarafoonnadu aamusaan waxaa isku qabsada naadada waratada, biraha la tumayo, mashiinnada shamiitada, hoonka gawaarida, iyo guuxa diyaaradaha. Colaaddii, qaraxii, dilkii, iyo qaxii way yaraadeen, marka laga reebo barakaca ay dowladdu waddo iyo dadka lagu dilo hawlgaladaas, haddana fiidkii jugta rasaasta iyo madaafiicda argagaxa leh ee tababbarka ciidanka iyo tijaabadu waxay gilgiliyaan qofkii aan la qabsan, taasoo xasuusinaysa xaqiiqo ah in weli aan la gaarin amni iyo xasillooni buuxda, nabaduna ayan ahayn maqnaanshaha colaadda balse jiritaanka caddaaladda. Si aad u gaarto maqaaxiyaha iftiimsan ama uga soo adeegato suuqyada casriga ah waa in aad soo martaa baro-koontorool oo ay askar ku sugan yihiin, waddooyin jajaban, godad biyo fadhiyaan, iyo qashin dabayluhu kala haadiyeen, halka gudaha shaaha iyo kabashiin lagu cabbaa iftiin diirran, bannaankana bullaacaduhu sii qulqulayaan. Warsame wuxuu tusaale u soo qaatay cunista malabaani oo ah canbuulo aad u qoyan, saliid macsaro iyo sonkor xad-dhaaf ah lagu daray, caano garoor lagu shubay, oo isu waalaqday macaan, dhanaan, biyo iyo dufan, taasoo u dhiganta magaalada oo dhinac kasta malabaani tahay. Suuqyadu waa casri, maqaaxiyadu waa kaahayaan, hoteelladu waxay leeyihiin muuqaal caalami ah, bangiyadu waxay ku shaqeeyaan tiknoolojiyadii ugu dambeysay, internet-ku waa xawaare sare, wax walbana waxay u eg yihiin horumar marka laga eego muuqaalka. Laakiin halbeegga dhabta ah ee horumarka iyo nolosha casriga ah waa sharci sareeya oo aan eex lahayn, nidaam caddaaladeed oo xaqsoor leh, qiyam bulsho oo danta guud la wada leeyahay, iyo hawl u baahan muwaadinimo, xuquuq iyo waajibaad isu dheellitiran. Muqdisho lagama xiiseeyo afkaaraha, suugaanta, taariikhda, dhaqanka, diinta, iyo fahamka dunida, balse waxaa loo arkaa macno iyo dan la'aan, taasoo keenaysa in nidaamka iyo fawdadu is barbar socdaan, noloshii miyiga iyo tii magaaladana isdhexyaacaan. Waxay tahay nolol u muuqata mid iftiimayso laakiin hoosta mugdi ka ah. Natiijo ahaan, xildhibaanku wuxuu ugu baaqayaa in horumarka laga dhiso qiyam iyo caddaalad halkii laga dhisi lahaa dhismooyin keliya, isagoo sheegay in Muqdisho aysan lahayn dhaqan ilbaxnimo iyo hay'ado dowladeed oo isu dheellitiran oo koriya. Warar dambe ayaa sheegaya in dowladda Soomaaliya ay ansixisay qorshe lagu hagaajinayo laamiyada iyo bullaacadaha, balse dadweynuhu weli shaki ka muujiyaan inuu yahay mid waara. Falanqeeyayaal ayaa tilmaamay in magaalooyinka Soomaalida ay u baahan yihiin horumar hay'adeed iyo dhaqan magaalo oo xooggan ka hor inta aan la gaarin nolol casri oo dhab ah. DALNEWS