Faahfaahinta Warka
Guddiga Madaxabannaan ee Doorashooyinka Qaranka iyo Soohdimaha ayaa maanta shaaca ka qaaday jadwalka dhammaystiran ee doorashooyinka qof iyo cod ee dowlad-goboleedyada dalka Soomaaliya. Jadwalkan uu guddigu soo saaray waxaa ka mid ah taariikhaha ay ku dhacayaan doorashooyinka hoggaamiyayaasha maamul-goboleedyada Koonfur Galbeed, Galmudug iyo HirShabelle, iyo sidoo kale doorashooyinka golayaasha deegaanka ee maamulladaas. Doorashada hoggaamiyaha dowlad-goboleedka Koonfur Galbeed ayaa lagu wadaa inay qabsoonto 23-kii bisha May 2026. Doorashooyinka hoggaamiyayaasha Galmudug iyo HirShabelle waxaa la qaban doonaa 9-kii bisha July 2026. Guud ahaan, doorashooyinkani waxay qayb ka yihiin geedi socodka lagu wado in lagu dhammeeyo dhismaha maamullada deegaanka Soomaaliya. Sidoo kale, jadwalkan waxaa ku jira doorashooyinka gobolka Banaadir. Golaha deegaanka ee caasimadda Muqdisho waxaa la qaban doonaa 30-kii bisha July 2026. Doorashada duqa magaalada Muqdisho iyo ku-xigeennadiisa waxay dhacaysaa 5-tii bisha August 2026. Isla maalintaas, 30-kii July, waxaa sidoo kale lagu qaban doonaa doorashada golaha deegaanka ee gobolka Gedo, kaas oo hoos yimaada maamulka Jubaland. Guddigu waxa uu sheegay inuu soo saari doono xeerno nidaamiyeyaal, habraacyo iyo tilmaamo farsamo oo faahfaahsan, kuwaas oo si cad u qeexaya dhammaan marxaladaha doorashada iyo sida loo dhaqan gelin doono. Waxa kale oo guddigu si gaar ah uga hadlay muhiimadda ay leedahay daah-furnaanta, isla xisaabtanka, ilaalinta anshaxa doorashada, iyo dhex-dhexaadnimada si loo dhiso kalsoonida dadweynaha ku aaddan geedi socodka doorashada. Guddigu wuxuu ugu baaqay dhammaan ururrada siyaasadda, musharrixiinta, hay'adaha dowladda, maamul-goboleedyada, ururrada bulshada rayidka ah, iyo guud ahaan shacabka Soomaaliyeed inay si buuxda u hoggaansamaan jadwalkan iyo habraacyada la soo saarayo, si loo xaqiijiyo doorasho hufan, nabad ah, oo lagu kalsoonaan karo. Jadwalkan cusub waxa uu imaanayaa xilli ay dalka ka taagan tahay xiisad xooggan oo u dhexeysa hoggaanka dowladda federaalka iyo mucaaradka, taas oo salka ku haysa hannaanka doorashada iyo dastuurka cusub ee baarlamaanku ansixiyay. somali