Faahfaahinta Warka

Madaxweynaha Soomaaliya, Xasan Sheekh Maxamuud, ayaa si degdeg ah uga jawaabay cabashada ka soo baxday Sheekh Qaasim Yaasheyga, oo ah 95 jir oo indho la’ ah, kaas oo sheegay in gurigiisa oo ku yaalla degmada Shibis ee gobolka Banaadir la burburiyay. Sheekh Qaasim oo hadal uu warbaahinta siiyay ka hor ayaa ka hadlay cagafta lagu sameeyay gurigiisa. Madaxweynaha ayaa amar culus u fidiyay guddoomiyaha gobolka Banaadir, duqa Muqdisho, si loo xalliyo arrintan si degdeg ah. Agaasimaha warfaafinta gobolka Banaadir, Xuseen Cabdulle, ayaa sheegay in cabashada Sheekh Yaasheyga, oo ah imaam masjid ka ah degmada Shibis, la xalliyay iyadoo la fulinayo amarka madaxweynaha. Ka dib, Sheekh Qaasim ayaa farxadiisa ka hadlay, isagoo u mahadceliyay madaxweynaha iyo maamulka gobolka Banaadir. Waxa uu yiri: "Walaalkeygii Muungaaboow, khayrkaaga waa isoo gaaray. Waad iga farxiseen. Fariintii waan arkay, waxaa laygu yiri waa laguu cabiraa." Sheekha ayaa u duceeyay madaxweynaha iyo maamulka. Dhacdadani waxay keentay in madaxweynaha iyo duqa Muqdisho loogu bogaadiyo sida ay ula shaqeeyeen cabashada oo ay u xallin gareeyeen, iyadoo Sheekh Qaasim la tilmaamay qof danyar ah oo muddo dheer dhaqaale u kaydiyay gurigiisa. somali