Weerar xagga shabakadda ah ayaa lagu qaaday jaamacado iyo dugsiyo ku yaalla Mareykanka, Kanada iyo Australiya, kaas oo keenay qas iyo jahawareer baahsan, isagoo khalkhal weyn ku sameeyay xilliga ugu adag ee dhamaadka sannadka waxbarashada.

Kooxda ShinyHunters oo ah kuwa jebiya nidaamyada shabakadaha ayaa la sheegay inay sheegteen mas'uuliyadda weerarka, kaas oo sababay in barnaamijka waxbarasho ee Canvas ee ay adeegsadaan kumannaan dugsi iyo jaamacad uu shaqada joojiyo usbuucan.

Khamiistii markii ay habeenkii dhowaatay, shirkadda Instructure oo ay leedahay Canvas ayaa boggeeda waxay ku soo qortay in Canvas uu u furan yahay inta badan isticmaalayaasha, laakiin qaar ka mid ah jaamacadaha ayaa wali Jimcihii sheegayay in ay jiraan carqalado.

Weerarrada shabakadda ayaa beegsaday jaamacado iyo dugsiyo ku baahsan adduunka oo dhan, waxaana lagu qiyaasay in saamayn ku yeeshay 9,000 oo hay'adood.

Jaamacadda Sydney waxay Jimcihii ardayda u sheegtay in Canvas uu shaqo la'yahay, waxayna ku boorisay ardayda in aanay isku dayin inay galaan barnaamijka.

Jaamacadda ayaa boggeeda ku qortay ogeysiis ay sheegtay inay ka mid tahay 9,000 oo hay'adood oo adduunka ah oo khalkhalku saameeyay, iyagoo wali ka sugeya talo shirkadda Instructure.

Jaamacadda ayaa sheegtay in khalkhalku saameeyay shaqooyinka ardayda iyo imtixaannadoodaba, iyadoo qirtay in arrintani ay wax u dhimeyso xilliga ugu muhiimsan ee simistarka.

Jaamacadda Penn State waxay Khamiistii ardayda u dirtay fariin ay ku sheegtay inaanu qofna awoodi karin inuu galo Canvas, iyadoo ku dartay inaanay suurtogal ahayn in xallinta khalkhalka la gaaro inta 24 saac ee soo socota gudahood.

Jaamacadda ayaa baalisay qaar ka mid ah imtixaannadii loo qorsheeyay Khamiista iyo Jimcihii.

Khamiistii markay ahayd fiidkii, Jaamacadda British Columbia ee ku taalla Vancouver waxay ardayda ku wargelisay in Canvas uu shaqo la'yahay sababo la xiriira jab shabakadeed oo dhacay shirkadda Instructure oo ay hoos timaaddo, waxayna ku talisay in ay isla markiiba ka baxaan nidaamka.

Jaamacadda Toronto ayaa sidoo kale sheegtay in jabkaani saamayn ku yeeshay, iyadoo lagu xusay in jaamacado badan ay dhibaatadaasi soo gaartay.

Ardayda Jaamacadda California ee magaalada Los Angeles ayaa dhibaato kala kulantay soo gudbinta shaqooyinkooda iyagoo adeegsanaya nidaamka Canvas, halka Jaamacadda Chicago oo ka taalla Illinois ay si ku meel gaar ah u bakhtiisay boggeeda Canvas kadib markii la soo sheegay in la beegsaday.

Wargeyska Chicago Maroon oo ay jaamacaddu leedahay ayaa soo bandhigay sawir qoraal ah oo ka yimid kooxda ShinyHunters, kaas oo u muuqday inay dalbaneen madax furasho.

Qoraalka ayaa lagu dhiirigeliyay jaamacadda inay si qarsoodi ah ula xiriirto kooxda jabisay nidaamka si looga wada xaajoodo dejinta arrinta, loogana fogaado in xogooda la sii daayo.

Luke Connolly oo ah falanqeeye hanjabaadaha amniga shabakadda ee shirkadda Emisoft, ayaa wakaaladda Associated Press u sheegay in sawir-qaadayaalka ay muujinayaan in hanjabaadaha kooxdu diyaarisay ay bilaabmeen Axadii, iyadoo muddooyinka ugu dambeeya loo qabtay Khamiista iyo 12-kii Maajo.

Wuxuu intaas ku daray in wadahadallo ku saabsan bixinta lacagaha madax-furashada ay suurtogal tahay in ay sii socdaan.

Weerarradii shabakadda ee Khamiistii ayaa soo beegmay isla maalintii uu Chuck Schumer oo ah hoggaamiyaha Aqalka Sare ee Mareykanka u diray qoraal maamulkii Trump, kaas oo uu kaga dalbaday in la xoojiyo difaaca ka dhanka ah khataraha shabakadda xilligan uu si degdeg ah u horumarayo AI oo ah garaad macmal ah.

Schumer waxa uu qoraalkiisa ku sheegay in Wasaaradda Amniga Gudaha oo ah hay'adda ka caawisa ka hortagga weerarrada shabakadda ay tahay in ay gargaar degdeg ah gaadhsiiso gobollada iyo degmooyinka, isagoo xusay in aan la rabin in dadka Mareykanka ay la kulmaan cawaaqib xumo oo soo gaarta.

Tech.